ராசிபுரம் பகுதியில் எம்ஜிஆா் பிறந்த நாள் கொண்டாட்டம்..!
ராசிபுரம் நகர அதிமுக சார்பில் எம்ஜிஆரின் 108-ஆவது பிறந்த தினம் நகரின் பல்வேறு வார்டுகளில் கட்சியினர் சார்பில் கொண்டாடப்பட்டது. மறைந்த முன்னாள் முதல்வர் எம்ஜிஆர் பிறந்த நாளையொட்டி ராசிபுரம் புதிய பேருந்து நிலையம் முன் உள்ள எம்ஜிஆர் உருவச் சிலைக்கு அதிமுக நகரச் செயலாளர் எம்.பாலசுப்பிரமணியம் தலைமையில் அதிமுகவினர் மாலை அணிவித்து, மலர் தூவி மரியாதை செலுத்தினர்.
கொண்டாட்டங்கள்
பின்னர் பட்டாசுகளை வெடித்தும், இனிப்புகள் வழங்கியும் கொண்டாடினர். அதனைத் தொடர்ந்து பழைய பேருந்து நிலையம், கடைவீதி, வி. நகர் உள்ளிட்ட நகரின் பல்வேறு பகுதிகளில் அலங்கரித்து வைக்கப்பட்டிருந்த எம்ஜிஆர் உருவப் படங்களுக்கு அதிமுகவினர் மலர் தூவி மரியாதை செலுத்தி, பொதுமக்களுக்கு இனிப்புகளை வழங்கினர்.
பங்கேற்பாளர்கள்
இதில் அதிமுக மாவட்ட அவைத் தலைவர் எஸ்.பி.கந்தசாமி, மாவட்ட எம்ஜிஆர் இளைஞரணி செயலர் வழக்குரைஞர் கே.பி.சுரேஷ்குமார், முன்னாள் நகர்மன்ற துணைத் தலைவர் எஸ்.வெங்கடாஜலம், நிர்வாகிகள் ராதா சந்திரசேகரன், வழக்குரைஞர் பூபதி உள்ளிட்ட அதிமுக நிர்வாகிகள் கலந்து கொண்டனர்.
அமமுக சார்பில் விழா
நாமக்கல் வடக்கு மாவட்ட அமமுக சார்பில் மாவட்டத்தின் பல்வேறு இடங்களில் எம்ஜிஆர் பிறந்த தின விழா கொண்டாடப்பட்டது. நாமக்கல் வடக்கு மாவட்ட அமமுக செயலாளர் ஏ. பி.பழனிவேல் தலைமையில் ராசிபுரம் புதிய பேருந்து நிலையம் அருகே அலங்கரித்து வைக்கப்பட்டிருந்த எம்ஜிஆர் உருவப் படத்துக்கு மாலை அணிவித்து மலர் தூவி மரியாதை செய்தனர். பின்னர் பொதுமக்களுக்கு இனிப்புகள், நலத்திட்ட உதவிகள் வழங்கப்பட்டன.
மாவட்டம் முழுவதும் விழா
இதேபோல் மாவட்டத்தின் பல்வேறு இடங்களில் எம்ஜிஆர் பிறந்த நாளை முன்னிட்டு மாலை அணிவித்து கொடிகளை ஏற்றி பொதுமக்களுக்கு இனிப்புகள் வழங்கினர்.
சசிகலா அணியின் கொண்டாட்டம்
நாமக்கல் மாவட்ட சசிகலா அணி அதிமுக சார்பில் எம்ஜிஆரின் பிறந்த தினம் ராசிபுரத்தில் கொண்டாடப்பட்டது. இதில் சசிகலா அணியின் மாவட்ட பொறுப்பாளர் என். கோபால், நகரச் செயலாளர் எஸ்.வேலுசாமி ஆகியோர் தலைமையில் ராசிபுரம் பழைய பேருந்து நிலையம் அருகே அலங்கரித்து வைக்கப்பட்டிருந்த எம்ஜிஆர் உருவப்படத்துக்கு மாலை அணிவித்து மலர் தூவி மரியாதை செலுத்தினர்.
2026 இலக்கு
தொடர்ந்து 2026-இல் கட்சியின் ஆட்சி அமைய பாடுபடுவோம் என முழக்கமிட்டனர்.
பங்கேற்பாளர்கள்
இந்த நிகழ்வில் வெண்ணந்தூர் ஒன்றிய பொறுப்பாளர் வழக்குரைஞர் வேலுசாமி, ராசிபுரம் ஒன்றிய பொறுப்பாளர் ரித்தீஷ், கட்சி நிர்வாகிகள் பலர் கலந்து கொண்டனர்.
